Timor-Leste: SITUASAUN SAI PIÓR IHA 2007-2008, "MONU" DALAS 22
Maioria hosi paíz luzofonia sira (nasaun ne'ebé adopta portugés nu'udár língua ofisiál), menus Cabo Verde, sai piór liu tan iha klasifikasaun kona-ba korrupsaun, Transparency International fó-sai ohin. Transparency International halo análize ba nivel iha fenómena ida ne'e iha nasaun 180.
Lista ne'ebé publika tinan-tinan, halo estimativa ba magnitude korrupsaun iha setór públiku tuir persepsaun hosi negósiu ho analista sira iha nasaun sira ne'e ida-ida. Klasifikasaun hosi nasaun sira ne'e hahú hosi nasaun ne'ebé iha korrupsaun menus liu (dalas 1) to'o nasaun ne'ebé iha korrupsaun aas liu (dalas 180) no korresponde ba eskala ho pontu 10 (livre hosi korrupsaun) to'o zero (korruptu tebetebes).Tuir Transparency International, Timor-Leste agora tama iha grupu nasaun ne'ebé situasaun ne'e sai piór "tebe-tebes" (signifikadamente) entre 2007 ho 2008, hafoin rejista mundasa aat liu iha eskala hodi tun hosi fatin 22 ba kraik.Nasaun ne'ebé iha tinan kotuk okupa dalas 123 ho pontu 2,5, tinan ne'e monu ba dalas 145 ho pontu 2,2, hanesan ho Kazakhstan, maibé di'ak liu uitoan kompara ho nasaun sira hanesan Bangladesh, Kenya ho Rúsia.Portugal okupa dalas 32 iha tinan ne'e ho pontu 6,1, tun pontu 0,4 kompara ho índise ba tinan 2007 nian.Hosi nasaun luzofonia sira seluk, Cabo Verde sa'e dalas rua ba leten ho índise muda hosi dalas 49 ba 47 hamutuk ho Costa Rica, Úngria, Jordánia ho Malázia.Brazil mai tuir Cabo Verde nu'udár nasaun luzofonia ne'ebé hetan klasifikasaun di'ak liu, maske ninia pozisaun iha dalas 80 iha 2008 defaktu monu hosi dalas 8 ba kraik kompara ho tinan kotuk.Burkina Faso, Morroco, Saudi Arabia ho Tailándia iha pozisaun hanesan ho Brazil.São Tomé e Príncipe ladún monu maka'as hosi pozisaun 118 iha tinan kotuk ba 123 iha 2008 maibé nia mantén pontu hanesan (2,7) no iha fatin hanesan ho nasaun sira seluk hanesan Nepal, Togo, Nigeria ho Vietnam.Mosambike monu hosi dalas 15 iha lista ne'e no lakon pontu 0,2 hodi okupa pozisaun 126, enkuantu Angola ho Guiné-Bissau lakon dalas 11 ba okos, ne'ebé korresponde ho redusaun pontu hosi 2,2 ba 1,9.Angola ho Guiné-Bissau agora okupa dalas 158 hamutuk ho Azerbaijan, Burundi, Gambia, Congo, Sierra Leonne ho Venezuela.Macau, Rejiaun Administrativa Espesiál China nian, tun hosi 34 iha tinan kotuk ba 43 iha tinan ne'e no korresponde ba redusaun pontu hosi 5,7 ba 5,4. Iha tinan rua tuir-tuir malu Macau rejista iha "agravamentu iha nivel ne'ebé haree hanesan korrupsaun" (increase in level of perceived corruption; agravamento dos níveis percebidos de corrupção).Análize hosi nasaun 180 ne'e hatudu katak Dinamarka, Noza Zelándia ho Suésia maka mai iha primeiru lugár ho pontuasaun 9,3, tuir fali Singapura ho 9,2.Iha dalas ikus liu maka Somália ho pontu 1, tuir fali Irák ho Myanmar ho pontuasaun 1,3 ho Haití ho 1,4.Durante aprezentasaun ba índise ne'e iha Berlín, Huguette Labelle, prezidente Transparency International nian, revela katak iha aumentu iha nivel korrupsaun iha nasaun ki'ak sira no eskándalu ne'ebé mosu bebeik iha korporasaun boot sira iha nasaun riku sira."Kontinuasaun iha aumentu iha nivel korrupsaun ho pobreza, ne'ebé ameasa sosiedade barak iha mundu ne'e, lori hela ita ba dezastre umanitária no ita labele tolera ida ne'e. Até iha nasaun sira ne'ebé privilejiadu tebe-tebes, ne'ebé sansaun la aplika ho proporsaun, luta hasoru korrupsaun ne'e mós tenke haka'as tan," nia defende. (timorlorosaenacaolia-founihatetun.blogspot.com)
No comments:
Post a Comment